تکمیلِ دین

مسلمان ہونے کی شرطِ اوّلین اللہ تعالیٰ کی وحدانیت کا اقرار اور بطور آخری نبی حضرت محمد صلی اللہ علیہ وآلہٖ وسلم کی رسالت کی تصدیق ہے۔ یعنی جب کلمہ طیب پڑھا جاتا ہے تو اس میں ہم اللہ کی وحدانیت اور حضور علیہ الصلوٰۃ والسلام کی رسالت پر ایمان لا رہے ہوتے ہیں۔ حضور علیہ الصلوٰۃ والسلام کے خاتم الانبیا ہونے پر جو شک کرتا ہے وہ مسلمانوں کی صف سے نکل جاتا ہے اور اس کا ایمان زائل ہو جاتا ہے۔
ختمِ نبوت کے متعلق ارشادِ ربّانی ہے:
مَا کَانَ مُحَمَّدٌ اَبَآ اَحَدٍ مِّنْ رِّجَالِکُمْ وَلٰکِنْ رَّسُوْلَ اللّٰہِ وَخَاتَمَ النَّبِیّٖنَ (سورۃ الاحزاب۔ 40)
ترجمہ: محمد (صلی اللہ علیہ وآلہٖ وسلم) تمہارے مردوں میں سے کسی کے باپ نہیں ہیں لیکن وہ اللہ کے رسولؐ اور سب انبیا کے آخر میں (سلسلہ نبوت کو ختم کرنے والے) ہیں۔

khatam e nabuwat in urdu

حضرت محمد صلی اللہ علیہ وآلہٖ وسلم تمام نبیوں اور رسولوں کے آخر میں تشریف لائے۔ نبوت و رسالت کا جو سلسلہ حضرت آدم علیہ السلام سے شروع ہوا تھا وہ حضور علیہ الصلوٰۃ والسلام پر ختم ہو گیا ۔گزشتہ انبیاعلیہم السلام کی تبلیغ و ہدایت اور نبوت و رسالت ایک علاقے یا ملک تک محدود رہی۔ انہوں نے کبھی عالمگیر دعوت و پیغامِ حق کا دعویٰ نہیں کیا لیکن آپ صلی اللہ علیہ وآلہٖ وسلم کاپیغام عالمگیر تھا اور آپؐ کی مخاطب پوری دنیا تھی۔ آپ صلی اللہ علیہ وآلہٖ وسلم پوری کائنات کے لیے’بشیر‘ اور ’نذیر‘ بن کر تشریف لائے اور اللہ تعالیٰ کا پیغام مکمل اور محفوظ شکل میں تمام دُنیا کے انسانوں کی ہدایت کے لیے باقی چھوڑا اورکسی نئے نبی یا رسول کے آنے کی ضرورت کو ختم کر دیا۔ اس لیے قرآنِ حکیم نے آپ صلی اللہ علیہ وآلہٖ وسلم کو ’’خاتم النبیین‘‘ کہا۔ عربی زبان میں ’’خاتم‘‘ کا معنی اس مہر کے ہیں جو لفافے پر اس لیے لگائی جاتی ہے تاکہ اس میں کوئی کمی بیشی نہ کی جا سکے۔ اس لیے آپ صلی اللہ علیہ وآلہٖ وسلم کے آنے سے نبوت و رسالت کا سلسلہ سر بہ مہر ہو گیا اور آپ صلی اللہ علیہ وآلہٖ وسلم کے بعد اب کوئی نبی نہ آئے گا۔ یہی وہ حقیقت ہے جس کی گواہی خود حضور علیہ الصلوٰۃ والسلام نے یہ کہہ کر دی ’’میری اور تمام انبیا علیہ السلام کی مثال اس شخص کی طرح ہے جس نے ایک عمدہ اور خوبصورت عمارت بنائی اور لوگ اس کے آس پاس چکر لگا کر کہنے لگے ہم نے اس سے بہترین عمارت نہیں دیکھی مگر یہ ایک اینٹ (کی جگہ خالی ہے جو کھٹک رہی ہے) تو میں (اس عمارت کی) وہ (آخری) اینٹ ہوں۔‘‘ (صحیح مسلم5959)

تکمیلِ دین

اللہ تعالیٰ نے آپ صلی اللہ علیہ وآلہٖ وسلم پر دینِ اسلام کو مکمل کر دیا اور فرمایا:
اَلْیَوْمَ اَکْمَلْتُ لَکُمْ دِیْنَکُمْ وَ اَتْمَمْتُ عَلَیْکُمْ نِعْمَتِیْ وَ رَضَیْتُ لَکُمُ الْاِسْلَامَ دِیْنًا (سورۃ المائدہ۔3)
ترجمہ: آج میں نے تمہارے لیے تمہارا دین مکمل کر دیا اور تم پر اپنی نعمت (نبوت و رسالت) پوری کر دی اور تمہارے لیے اسلام کو (بطور) دین پسند کر لیا۔

اللہ تعالیٰ نے آپؐ پر دین مکمل کر دیا اور دین کے مکمل ہونے کے بعد کسی نئے نبی کی ضرورت نہیں رہتی۔دین کی تکمیل سے مراد یہ ہے کہ اللہ تعالیٰ نے اپنے محبوب حضرت محمد صلی اللہ علیہ وآلہٖ وسلم کے ذریعے ناصرف قرآن بلکہ اس کی ظاہری تعمیل بھی آپ صلی اللہ علیہ وآلہٖ وسلم کے ایک ایک عمل سے واضح کر کے دکھا دی۔ عبادات، اخلاقیات، معاملات غرض ہر لحاظ سے شریعتِ محمدی کی صورت میں ایک مکمل ضابطہ حیات مسلمانوں کے لیے موجود ہے لہٰذا اب اگر کوئی یہ دعویٰ کرے کہ میں شریعت کا فلاح حصہ مکمل کرنے آیا ہوں تو وہ لعنتی ہے، کذاب ہے۔ حضرت محمد صلی اللہ علیہ وآلہٖ وسلم کے بعد نہ تو کسی پر وحی نازل ہوگی اور نہ ہی کوئی الہامی کتاب۔ دین بھی مکمل ہو چکا اور احکاماتِ دین بھی۔

ختمِ نبوت سے متعلق ارشاداتِ نبویؐ

حضور اکرم صلی اللہ علیہ وآلہٖ وسلم نے اپنے کئی ارشادات میں ختمِ نبوت کو واضح کیا ہے جن میں سے چند ایک مندرجہ ذیل ہیں:
نبی کریم صلی اللہ علیہ وآلہٖ وسلم نے فرمایا: ’’بنی اسرائیل میں جب ایک نبی وفات پا جاتا تو دوسرا نبی اس کا جانشین ہوتا مگر میرے بعد کوئی نبی نہیں۔‘‘ (صحیح بخاری)
اب رسالت ونبوت منقطع ہو چکی ہے لہٰذا میرے بعد نہ کوئی رسول ہو گا اور نہ کوئی نبی۔
میں عاقب ہوں اور عاقب وہ ہوتا ہے جس کے بعد کوئی نبی نہیں۔ (صحیح بخاری)
حضور علیہ الصلوٰۃ والسلام نے حضرت علیؓ سے فرمایا: تم مجھ سے وہی نسبت رکھتے ہو جو ہارون علیہ السلام کو موسیٰ علیہ السلام سے تھی مگر میرے بعد کوئی نبی نہیں‘‘۔
حضرت ابو امامہؓ سے روایت ہے کہ آپ صلی اللہ علیہ وآلہٖ وسلم نے فرمایا: ’’میں آخری نبی ہوں اور تم آخری امت ہو‘‘۔
حضرت عائشہ صدیقہؓ آنحضرت صلی اللہ علیہ وآلہٖ وسلم کا ارشاد نقل کرتی ہیں ’’میں آخری نبی ہوں اور میری مسجد انبیا کی مساجد میں آخری مسجد ہے‘‘۔
حضرت عقبہ بن عمرؓ سے روایت ہے کہ حضور علیہ الصلوٰۃ والسلام نے فرمایا: ’’میری امت میں جھوٹے پیدا ہوں گے ہر ایک یہی کہے گا کہ میں نبی ہوں حالانکہ میں خاتم النبیین ہوں میرے بعد کوئی کسی قسم کا نبی نہیں‘‘۔
حضرت ابوذرؓ سے روایت ہے کہ رسول صلی اللہ علیہ وآلہٖ وسلم نے فرمایا: ’’ابوذرؓ! نبیوں میں سب سے پہلے نبی آدمؑ اور سب سے آخری نبی محمدؐ ہیں‘‘۔
حضرت علیؓ سے منقول ہے کہ آپ صلی اللہ علیہ وآلہٖ وسلم کے دونوں شانوں کے درمیان مہرِ نبوت تھی اور آپ صلی اللہ علیہ وآلہٖ وسلم خاتم النبیین ہیں‘‘۔ (جامع ترمذی)
حضرت انس بن مالکؓ سے روایت ہے کہ رسول اللہ صلی اللہ علیہ وآلہٖ وسلم نے ارشاد فرمایا ’’رسالت اور نبوت تو ختم ہو چکی ہے میرے بعد نہ کوئی رسول ہے نہ نبی۔ یہ بات صحابہؓ پر شاق گزری تو آپ صلی اللہ علیہ وآلہٖ وسلم نے فرمایا’’مبشرات باقی ہیں‘‘۔ صحابہؓ نے عرض کیا ’’مبشرات کیا ہیں؟‘‘ آپ صلی اللہ علیہ وآلہٖ وسلم نے فرمایا ’’سچے خواب اور وہ نبوت کا چھیالیسواں حصہ ہیں۔‘‘ (جامع ترمذی)
رسول اللہ صلی اللہ علیہ وآلہٖ وسلم نے ارشاد فرمایا: ’’میں اللہ کے نزدیک اس وقت خاتم النبیین مقرر ہو چکا تھا جبکہ آدمؑ ابھی گارے ہی کی شکل میں تھے۔‘‘ (ترمذی)
رسول اللہ صلی اللہ علیہ وآلہٖ وسلم نے ارشاد فرمایا:
مجھے چھ چیزوں کے ذریعہ دیگر انبیا پر فضیلت دی گئی ہے:
مجھے جامع کلمات عطا ہوئے، دشمنوں کے دل میں میرا رعب ڈال کر مجھے فتح و نصرت عطا فرمائی گئی،مالِ غنیمت میرے لیے حلال قرار دیا گیا، ساری زمین کو میرے لیے سجدہ کی جگہ اور پاک کرنے کا ذریعہ قرار دیا گیا، ساری مخلوق کے لیے مجھے رحمت بنا کر بھیجا گیااور نبوت و رسالت کا سلسلہ مجھ پر ختم کر دیا گیا‘‘۔

فتحِ بابِ نبوت پہ بے حد درود
ختمِ دَورِ رسالت پہ لاکھوں سلام

اجماعِ صحابہؓ

تمام صحابہ کرامؓ کا اس بات پر اجماع ہے کہ آپ صلی اللہ علیہ وآلہٖ وسلم کے بعد کوئی نبی نہیں آئے گا۔ اسی لیے حضرت ابو بکرؓ نے صحابہ کرامؓ کا ایک لشکر اس نبوت کے جھوٹے دعویدار کی سرکوبی کے لیے روانہ کیا جس کی وضاحت کے لیے ایک چھوٹا سا واقعہ بیان کیا جا رہا ہے۔

جنگِ یمامہ:

جنگِ یمامہ مسیلمہ کذاب کے دعویٰ نبوت کے نتیجے میں لڑی گئی جس میں بہت سے صحابہ کرامؓ شہید ہوئے لیکن اس فتنے کو مکمل مٹا ڈالا گیا۔ خلیفہ اوّل سیدّنا ابو بکر صدیقؓ خطبہ دے رہے تھے: ’’لوگو! مدینہ میں کوئی مرد نہ رہے، اہلِ بدر ہوں یا اہلِ احد، یمامہ کا رخ کرو‘‘۔ بھیگتی آنکھوں سے وہ دو بارہ بولے:’’مدینہ میں کوئی نہ رہے حتیٰ کہ جنگل کے درندے آئیں اور ابوبکر کو گھسیٹ کر لے جائیں‘‘۔صحابہ کرامؓ کہتے ہیں کہ اگر حضرت علی المرتضیٰ سیدّنا صدیقِ اکبرؓ کو نہ روکتے تو وہ خود تلوار اٹھا کر یمامہ کا رخ کرتے۔

ہزار کے مقابل بنو حنفیہ کے جنگجو اسلحہ سے لیس کھڑے تھے۔ جنگِ یمامہ وہ جنگ تھی جس کے متعلق اہلِ مدینہ کہتے تھے بخدا ہم نے ایسی جنگ نہ پہلے کبھی لڑی نہ بعد میں لڑی۔ ختمِ نبوت کے دفاع میں صحابہ کرامؓ کٹے جسموں کے ساتھ مقتل میں پڑے تھے۔ اے مسلمانو! تمہیں پھر بھی ختم نبوتؐ کی اہمیت معلوم نہ ہوئی۔ انصار کا وہ سردار ثابت بن قیس جس کی بہادری کے قصّے عرب و عجم میں مشہور تھے اس کی زبان سے جملہ ادا ہوا: اے اللہ! جس کی یہ عبادت کرتے ہیں میں اس سے برات کا اظہار کرتا ہوں۔ چشمِ فلک نے وہ منظر دیکھا جب وہ اکیلا ہزار کے لشکر میں گھس گیا اور اس وقت تک لڑتا رہا جب تک اس کے جسم پر کوئی ایسی جگہ نہ بچی جہاں شمشیرو سناں کا زخم نہ لگا ہو۔ عمر بن خطابؓ کے بھائی زید بن خطابؓ جو اسلام لانے والوں کی صفِ اوّل میں شامل تھے انہوں نے مسلمانوں میں آخری خطبہ دیا ’’واللہ! میں آج کے دن اس وقت تک کسی سے بات نہ کروں گا جب تک انہیں شکست نہ دے دوں یا شہید نہ ہو جاؤں‘‘۔ اے مسلمانو! تمہیں پھر بھی ختمِ نبوت کی اہمیت معلوم نہ ہوئی۔ بنو حنفیہ کا باغ حدیقتہ الرحمان میں اتنا خون بہا کہ اسے حدیقتہ الموت کہا جانے لگا، اس باغ کی دیواریں مثل قلعہ کی تھیں۔ کیا عقل یہ سوچ سکتی ہے کہ ہزاروں کا لشکر ہو اور برابن مالک کہے:’’اے مسلمانو! اب ایک ہی راستہ ہے کہ تم مجھے اٹھا کر قلعے میں پھینک دو میں تمہارے لیے دروازہ کھولوں گا‘‘۔ انہوں نے دیوار پر کھڑے ہوکر منکر ینِ ختمِ نبوت کے اس لشکر کو دیکھا اور پھر تن تنہا اس قلعے میں چھلانگ لگا دی قیامت تک جو بھی بہادری کا دعویٰ کریگا یہاں وہ بھی سر پکڑ لے گا!!! ایک اکیلاشخص ہزاروں سے لڑرہا تھا۔ اس نے دروازہ بھی کھول دیا اور پھر مسلمانوں نے منکرین ختمِ نبوت کو کاٹ کر رکھ دیا۔

اے مسلمانو! کاش کہ تم جان لیتے کہ تمہارے اسلاف نے اپنی جانیں دے کر رسول اللہ صلی اللہ علیہ وآلہٖ وسلم کی ختمِ نبوت کا دفاع کیا ہے، کاش تمہیں رسولؐ کے ان صحابہؓ کے جذبوں کا علم ہوتاجوایک مٹھی بھر جماعت کے ساتھ حدِنگاہ تک پھیلے لشکر سے ٹکرا گئے۔

اللہ کا قانون ہے کہ جس چیز کی ضرورت باقی نہیں رہتی وہ مٹا دی جاتی ہے اور جس شے کی ضرورت ہوتی ہے وہ باقی رکھی جاتی ہے اور اسے مٹنے سے محفوظ کر لیا جاتا ہے۔ خاتم الانبیا حضور علیہ الصلوٰۃ والسلام سے پہلے کم و بیش ایک لاکھ چوبیس ہزار انبیا آئے لیکن دنیا آج ان میں سے اکثر کے ناموں سے بھی آگاہ نہیں۔ قرآن مجید سے پہلے بہت سی کتابیں نازل ہوئیں لیکن ان میں سے کوئی بھی اپنی اصل حالت میں محفوظ نہیں۔ جبکہ حضور علیہ الصلوٰۃ والسلام پر نازل ہونے والا قرآن اور اس کا ایک ایک حرف محفوظ ہے اور اس کی حفاظت کا ذمہ اللہ تعالیٰ نے خود لیا ہے۔ آپ صلی اللہ علیہ وآلہٖ وسلم کی شریعت کو محفوظ رکھا گیا جبکہ آپ سے پہلے انبیا کی شریعت یا تو مٹ گئیں یا ان میں اسقدر ردّ و بدل ہو گیا کہ وہ اپنی اصل صورت میں موجود نہیں۔ آپ صلی اللہ علیہ وآلہٖ وسلم کی سیرتِ مطہرہ کا ایک ایک پہلو روزِ روشن کی طرح واضح ہے جو اس بات کی دلیل ہے کہ حضور علیہ الصلوٰۃ والسلام ہی سے قیامت تک لوگ ہدایت پائیں گے اس پر حضور علیہ الصلوٰۃ والسلام کا درج ذیل فرمان مہرِ تصدیق ثبت کرتا ہے:
لَا نَبِیَّ بَعْدِیْ
ترجمہ: میرے بعد کوئی نبی نہیں۔
ختمِ نبوت کو شاعر نے کیا خوب انداز میں بیان کیا ہے:

اُتارا دینِ اسلام اور افضل کر دیا اس کو
ختم کر کے رسالت ربّ نے اکمل کردیا اس کو

نبوت کی عمارت میں فقط اک اینٹ رہتی تھی
میرے آقاؐ کی آمد نے مکمل کر دیا اس کو

خدا نے لاج رکھی اس طرح شمعِ رسالت کی
کبھی جو بجھ نہیں سکتی وہ مشعل کر دیا اس کو

کہاں رہتا شک و شبہ کوئی ختمِ نبوت میں
قرآنی آیتوں نے جب مدلل کر دیا اس کو

نہیں ہے کوئی گنجائش نئے دین و پیغمبر کی
کہ دو سو دس حدیثوں نے مفصل کر دیا اس کو

زمانۂ محمدؐ سے خدا نے روزِ محشر تک
بنا کے آخری امت مسلسل کر دیا اس کو

محمدؐ لائے جو مہرِ نبوت پاک شانوں پر
نشانی دے کے اللہ نے مسجل کر دیا اس کو

’’نہیں آئے میرے بعد کوئی بھی نبی لوگو‘‘!
حقیقت میں حقیقت نے ہی اٹل کر دیا اس کو

کیا جب بھی کسی کاذب نے دعویٰٔ پیغمبری
محمدؐ کے دیوانوں نے معطل کر دیا اس کو

کرو ہر جھوٹے دعویدار کی بس عقل پہ ماتم
کہ مرزائیت نے عقل سے ہی پیدل کر دیا اس کو

یہ فتنہ کیوں اٹھایا جاتا ہے ہر تھوڑے عرصے بعد
کہ جب آئین پاکستان نے مقفل کر دیا اس کو
(جوہر عباد)

قادیانیت ایک بہت بڑے فتنے کی صورت میں نمودار ہے۔ پس ہر صاحبِ ایمان کے ذمہ ہے کہ و ہ اس کے سدباب کی کوششوں میں شریک ہو۔ اے مسلمانو! تحفظِ ختمِ نبوت کے جہاد میں اپنا اپنا کردار ادا کرو تاکہ قیامت کے دن خاتم النبیینؐ کی شفاعت نصیب ہو۔